བྱང་ཆུབ་གླིང་།-དབེན་གནས་བཀྲ་ཤིས་ཁྲི་གླིང་།-འབྲེལ་ཡོད་ངོས་སྦྱོར།

བཀྲ་ཤིས་ཁྲི་གླིང་གི་མེ་བྱ་ལོའི་རྒྱུགས་སྤྲད་གཟེངས་རྟགས་མཛད་སྒོ། ༡༽


 

  དབེན་གནས་བཀྲ་ཤིས་ཁྲི་གླིང་གི་སྐབས་གཉིས་པའི་བསྙུང་གནས་སྒྲུབ་པ་མཇུག་དྲིལ་བའི་ཉི་མ་སྟེ། མེ་བྱ་ལོའི་ཟླ་བ་༨པའི་ཚེས་གསུམ་ཉིན་འཚོགས་འཁོར་དང་འབྲེལ། གྲྭ་བཙུན་འཛིན་གྲྭ་ཁག་གི་ལོ་སྔ་མའི་ལོ་མཇུག་གི་ལོ་འཁོར་རྒྱུགས་སྤྲད་ཀྱི་གཟེངས་རྟགས་གནང་བའི་མཛད་སྒོ་སྤེལ་ཏེ་ཕྱི་དྲོར་བདེ་བླག་ངང་མཇུག་གྲུབ་པའོ། །

       ད་ལོའི་རྒྱུགས་ཀྱི་མཛད་སྒོ་སྤེལ་ཚུལ་ལ་བསམ་བློ་བཏང་བ་ཡིན་ན་བསྡུས་པ་ངོ་མ་རེད་དེ། མ་འོངས་པའི་གནས་སྐབས་སུ་འདི་ལས་རྒྱས་དང་འདི་ལས་ངོ་མཚར་ཆེ་བ་ཡོང་ངེས་པ་ཅན་རེད། ཡོང་བའི་རྒྱུ་མཚན་ཡང་། གཅིག་ནས་ནང་གི་གྲྭ་བཙུན་ཆ་ཁའི་བསམ་བློ་དང་ཤེས་རིག་གང་ཐད་ནས་གོང་འཕེལ་འགྲོ་ངེས་རེད། དེ་ནས་མཛད་སྒོར་ཞུགས་པའི་དགེ་བའི་བཤེས་གཉེན་ལ་བསམ་བློ་བཏང་ན་ད་ལོ་ནི་ལས་ཀ་མང་བའི་སྟབས་ཀྱིས་བཀྲ་ཤིས་ཁྲི་གླིང་ལ་བཞུགས་པའི་མཁན་པོ་ཆ་ཁ་ཡང་བྱོན་ཐུབ་མི་འདུག  རྗེས་མའི་གནས་སྐབས་སུ་བསམ་བློ་བཏང་ན་ནི། ད་ལོ་ང་རང་ཁྲིན་ཏུའུ་ནས་ཡར་ཡོང་ནས་ད་བར་དུ། བླ་རུང་ཆོས་སྡེ་ཆེན་པོ་ནས་མཁན་པོ་ལས་འགན་པ་དང་འཛིན་གྲྭའི་མཁན་པོ་ཤ་སྟག་བཞི་བཅུ་ཙམ་ཞིིག་ང་སར་བྱོན་བྱུང་། ཁོང་རྣམ་པས་ཅི་གསུངས་དི་ཟེར་ན། ད་ཕྱིན་ཆད་རྒྱུགས་སྤྲོད་པའི་སྐབས་ཡིན་ནའང་འདྲ། ཁྲིམས་སྒྲིག་ལམ་གྱི་ཐད་ནས་ཡིན་ནའང་འདྲ། བསླབ་པ་སློབ་གཉེར་གྱི་ཐད་ནས་ཡིན་ནའང་འདྲ། ཅི་ཅི་ཅིའི་ཐད་ནས་ཁོང་རྣམ་པ་བཀྲ་ཤིས་ཁྲི་གླིང་འདིར་དངོས་སུ་བྱོན་ནས་ངེད་ཅག་ལ་རོགས་གང་དགོས་བྱེད་རྒྱུ་ཡིན། ཁྱོས་འདི་ན་སེམས་ཁུར་ཞིག་བྱེད་མི་དགོས་དང་ཕྱིན་ཆད་ཁོང་ཆ་ཁས་འདིའི་ཕྱི་ནང་གསང་གསུམ་གྱི་བསྟན་པ་ལ་འགན་ཁུར་ཡོང་ཞེས་ལན་མ་མང་པོ་གསུངས་བྱུང་། དེ་ཡང་ཁོང་རྣམ་པ་ཉི་མ་གཅིག་གཉིས་ཙམ་མ་ཡིན་པར་ཉི་མ་བཅུ་ཁ་དང་ཟླ་བ་རེ་གཉིས་མདོར་ན་ཅི་ཁོམ་གང་ཁོམ་བྱེད་ངེས་རེད། ཡང་སྒོས་ཁྱད་པར་ཅན་རྒྱུགས་སྤྲོད་རྟགས་མ་སྦྱིན་པའི་དེ་རིང་གི་དུས་ཚོད་འདི་ལ་ནི། སློབ་སྟོན་གྱི་དབུ་འཛིན་རྣམས་གཙོར་བྱས་ནས་མཁན་པོ་གཅིག་གཉིས་ཙམ་མ་ཡིན་པར་སྒར་གྱི་མཁན་པོ་མང་པོ་བྱོན་ནས་ང་ཚོ་ལ་གཟེངས་རྟགས་གནང་ངེས་པ་ཅན་རེད།

  ཅེས་མེ་བྱ་ལོའི་སྟོན་ཟླ་འབྲིང་པོའི་ནང་དུ་ལོ་སྔ་མའི་རྒྱུགས་སྤྲད་གཟེངས་རྟགས་གནང་དུས་སུ་༧བླ་མ་རིན་པོ་ཆེ་ཤེས་རབ་བཟང་པོས་གསུངས་སོ། །

 

 

དལ་འབྱོར་གྲུ་ཆེན་རྙེད་དཀའ་ཐོབ་དུས་འདིར། །

བདག་གཞན་འཁོར་བའི་མཚོ་ལས་བསྒྲལ་བྱའི་ཕྱིར། །

ཉིན་དང་མཚན་དུ་གཡེལ་བ་མེད་པ་ནི། །

ཉན་སེམས་སྒོམ་པ་རྒྱལ་སྲས་ལག་ལེན་ཡིན། །