བྱང་ཆུབ་གླིང་།-ཉིན་རེའི་ཞལ་གདམས།

མདོ་སྔགས་རིག་མཛོད།

  • 2017-12-18

    བྱམས་སྙིང་རྗེ་ནི་མ་གཞི་ནས་ཤེས་རབ་ཅིག་སྟེ། གང་ཟག་གང་ཞིག་ལ་བདག་འཛིན་དང་བདག་གིར་འཛིན་པ་ཤུགས་ཆེན་པོ་མེད་སྐབས་ད་གཟོད་དེ་ལ་བྱམས་སྙིང་རྗེའི་བློ་འཁྲུངས་པ་ཡིན། ལེགས་པར་བརྟགས་ན་རང་དོན་ཡིད་བྱེད་ནི་ནམ་ཡང་གཏི་མུག་དང་ལྷན་དུ་འགྲོགས་ཡོད། རང་འདོད་ཚ་བའི་མི་རྣམས་ཀྱིས་རང་ཉིད་ཁོ་ན་གཙུག་ཏུ་འཛིན་པ་ལས། རང་གི་ཁེ་ཕན་དང་རང་གི་བདེ་བ་སྒྲུབ་པ་ལ་ཉེ་འགྲམ་གྱི་མི་གཞན་དང་འབྲེལ་བ་ཡོད་པ་ལའང་བསམ་བློ་མི་གཏོང་། མ་ཟད་དེ་ལྟ་བུའི་སྒེར་འདོད་ཀྱིས་རང་གི་མིག་སྔར་ཁོ་ན་དོ་ཁུར་བྱེད་པ་ལས་ཐ་ན་རང་གི་མ་འོངས་པ་ཙམ་ལའང་བསམ་བློ་གཏོང་མི་ཤེས་པར་བྱས་ཡོད། རང་གཅེས་འདོད་ཀྱི་སེམས་ཤུགས་ཆེན་པོ་ཡོད་ནའང་གཅེས་ལུགས་གཏན་ནས་མི་ཤེས་པའི་འུ་ཐུག་གུ་དོག་གི་བསམ་བློ་དེ་འདྲ་དེ་བདག་གཅེས་འཛིན་འབའ་ཞིག་ལས་འབྱུང་བ་ཡིན་ཞིང་། གཞུང་རྣམས་སུ་བདག་འཛིན་ཇེ་སྲབ་ཏུ་འགྱུར་བའི་གོ་རིམ་ནི་རང་རྒྱུད་ཀྱི་ཤེས་རབ་འཕེལ་རྒྱས་སུ་འགྲོ་བའི་གོ་རིམ་ཡིན་པར་གསུངས་ཡོད།
    མཁན་པོ་ཤེས་རབ་བཟང་པོས།

  • 2017-12-17

    མི་ཚང་མས་རང་གཅེས་ཤེས་དགོས་ཟེར་ཡང་། དོན་དུ་མང་པོ་ཞིག་གིས་རང་ཉིད་ལ་གཅེས་པ་ནི་རང་ཉིད་ལ་འཛིན་པ་ཇེ་ཆེར་གཏོང་བ་དེ་ལ་འཁྲུལ་ཡོད། ངས་བསམས་ན། རང་ཉིད་ལ་གཅེས་ལུགས་ཡང་དག་པ་ནི། ཡུལ་དུས་གང་དུའང་རང་གི་ལུས་ངག་གི་སྤྱོད་པ་དང་། སེམས་ཀྱི་ཀུན་སློང་བཅས་དགེ་བའི་ཕྱོགས་སུ་འགྱུར་ཐབས་ལ་བརྩོན་རྒྱུ་དེ་རེད་དྲན་གྱིན་འདུག
    མཁན་པོ་ཤེས་རབ་བཟང་པོས།

  • 2017-12-16

    དགོས་ངེས་ཀྱི་སྒོར་མོ་འདང་ཚད་ཅིག་བཀོལ་རྒྱུ་ཡོད་ན་ཆོག་ཤེས་པར་བྱ་དགོས་པ་རེད་མ་གཏོགས་མི་ཚེ་སྒོར་མོའི་རྩོལ་སྒྲུབ་ལ་ཟད་པའི་ཚོང་ཆེན་དག་ཡིན་ཀྱང་། ཤི་དུས་ལས་དཀར་ནག་གི་རྗེས་སུ་འབྲང་དགོས་ཀྱི་འཆི་བ་གདོང་ལེན་པ་ལ་ནོར་གྱིས་བསྐྱབས་པ་སུ་ཡང་མ་བྱུང་ལ་འབྱུང་བའང་མི་སྲིད། དེས་ན་འཆི་ཆོས་དགེ་བ་དེ་ཡང་གསོན་པའི་སྐད་ཅིག་འདི་ཉིད་དམ་དུ་བཟུང་ནས་མ་བསྒྲུབས་ན། མིག་འཛུམ་ཙམ་གྱི་རྗེས་སུ་འཆི་བ་མགོ་ཐོག་ཏུ་མི་ཡོང་བའི་ངེས་པ་གཏན་ནས་མེད་པས་དེ་དུས་ཇི་ལྟར་བྱའམ།
    མཁན་པོ་ཤེས་རབ་བཟང་པོས།

  • 2017-12-15

    ངེད་ཅག་གིས་ཐུན་ཞིག་གཅད་དགོས་ནའང་སྔོན་དུ་བླ་མ་ལ་གསོལ་བ་འདེབས་རྒྱུ་དེ་གཙོ་བོ་ཡིན། ཐུན་མོང་མ་ཡིན་པའི་ཆོས་རྫོགས་པ་ཆེན་པོའི་ལྟ་བ་རང་རྒྱུད་ལ་སྐྱེ་དགོས་ནའང་དེ་རེད། དེ་མ་དགོས་ཐུན་མོང་ཕྱིའི་སྔོན་འགྲོ་དལ་འབྱོར་རྙེད་དཀའ་དང་ཚེ་མི་རྟག་པ་སོགས་རང་རྒྱུད་ལ་སྐྱེ་དགོས་ནའང་། བླ་མ་ལ་གསོལ་བ་འདེབས་པའི་སྟོབས་ཀྱིས་སྐྱེ་དགོས་པ་རེད། དེས་ན་རང་རྒྱུད་ཆོས་སུ་འཁོར་བར་བྱེད་པ་ལ་བླ་མ་ལས་གལ་ཆེ་བ་ཅི་ཡང་མེད་པས་བླ་མ་ཤིན་ཏུ་ནས་ཀྱང་གལ་ཆེན་པོ་ཡིན་ལེ་རེད།

  • 2017-12-14

    སངས་རྒྱས་ཀྱི་ཆོས་གཤའ་མ་ཞིག་ཡིན་ནས་བཟུང་། ཡུལ་དུས་གང་དུའང་ཉམས་ལེན་གྱི་མཐིལ་གཅིག་ཏུ་གྱུར་ཡོད་པ་རེད།
    མཁན་པོ་ཤེས་རབ་བཟང་པོས།

  • 2017-12-13

    རང་ཉིད་དང་མིག་སྔར་ཁོ་ན་ལ་དོ་ཁུར་བྱས་པ་དེས་འཚོ་བའི་མདུན་ལམ་ཇེ་བས་ཇེ་དོག་དང་སེམས་ཀྱི་རང་དབང་ཇེ་བས་ཇེ་ཆུང་དུ་བཏང་ཡོད། ཁོམ་སྐབས་དང་བསྟུན་ནས་སྟོན་པའི་སྐྱེས་རབས་ལྟ་བུ་ལ་གཟིགས་རྟོག་ཡག་པོ་ཞིག་གནང་ན། ང་ཚོས་ད་ལྟའི་རང་ཉིད་ཀྱི་བསོད་ནམས་ཅིའི་ཕྱིར་འདི་འདྲ་དམན་པའི་རྒྱུ་མཚན་སེམས་ལ་འཕྲོད་མོ་རེ་རྙེད་ཡོང་།
    མཁན་པོ་ཤེས་རབ་བཟང་པོས།

  • 2017-12-12

    ཇི་སྲིད་ཤ་ཁྲག་གདོས་བཅས་ཀྱིས་གྲུབ་པའི་ལུས་པོ་འདི་ཡོད་ནས་བཟུང་། ང་ཚོས་ངེས་པར་དུ་རྒ་བ་དང་ན་བ། འཆི་བའི་གོ་རིམ་བརྒྱུད་དགོས་ཤིང་། ཇི་སྲིད་སེམས་ནང་ན་འདོད་ཆགས་དང་ཞེ་སྡང་། གཏི་མུག་སོགས་ཀྱི་ཉོན་མོངས་ཡོད་ནས་བཟུང་། ང་ཚོས་ཅིས་ཀྱང་སྡུག་བསྔལ་མྱོང་དགོས།
    མཁན་པོ་ཤེས་རབ་བཟང་པོས།

  • 2017-12-11

    དལ་འབྱོར་རྙེད་དཀའ་དང་ཚེ་མི་རྟག་པ་སོགས་སྒོམ་སྐབས་རང་ཐོག་གི་ཉམས་མྱོང་ཡག་པོ་རེ་སྐྱེ་དུས་དེའི་ཐོག་ཏུ་གནས་ཅི་ཐུབ་གང་ཐུབ་བྱེད་དགོས། དེ་ལྟར་བྱས་ན་རིམ་གྱིས་དལ་འབྱོར་རྙེད་དཀའ་དང་ཚེ་མི་རྟག་པ་སོགས་ནི་ཁྱོད་ལ་མཚོན་ན་དཔེ་ཐོག་གི་ཤེས་བྱ་ཞིག་མིན་པར་འགྱུར་འགྲོ་བར་མ་ཟད། དེ་ནས་བཟུང་ཁྱོད་ཀྱིས་མི་ཚེ་རང་གི་ཚུལ་མིན་གྱི་འདོད་པ་དང་མཐུན་པའི་རེ་སྨོན་བྱེད་མི་སྲིད། དུས་ཚོད་དང་མི་ཚེ་ལ་ཡང་དག་པའི་ངེས་ཤེས་དེ་འདྲ་རྙེད་པ་ནི་མི་ཚེའི་ཉམས་མྱོང་ཡག་ཤོས་གཅིག་རེད།
    མཁན་པོ་ཤེས་རབ་བཟང་པོས།

  • 2017-12-10

    དམ་ཆོས་དམ་ཆོས་ཞེས་པ་དེའང་། ཁྱེད་ཆ་ཁས་འདང་རྒྱོབས་དང་། ཆེན་པོ་བྱས་ན་ཆེན་པོ་ཞིག་རེད་དེ། ཆུང་ཆུང་བྱས་ན་དགེ་སེམས་སྐད་ཅིག་མ་གཅིག་ཙམ་ཞིག་སྐྱེས་ནའང་། དེ་ཡང་རྟོགས་པའི་བསྟན་པ་ཡིན་གསུངས་པ་རེད།

  • 2017-12-09

    ལུས་པོར་བདག་སྐྱོང་ཅི་ཚད་ཡག་པོ་བྱས་ཀྱང་སྔ་ཕྱི་མ་གཏོགས་སུ་ལའང་གནད་དོན་འགའ་རེ་འབྱུང་ངེས་ཡིན།
    མཁན་པོ་ཤེས་རབ་བཟང་པོས།